(Tradisi di Nagari Magek)
O[eh: Irman Syah
Aratinyo, nan kamanjadi buah rundiangan di ambo kahadapan Sutan, maagak diari sahari nangko, hari baiak katiko elok. Baa di hari nan baiak katiko nan elok, diurang nan duo Suku, dijanji nan bakarang di padan nan baukua, janji bakarang bamuliakan pada baukua batapati.
Lah
baturuik labuah nan Panjang, arak-iriang sapanjang jalan, jalan bekelok
bakeh lalu. Bakelok ka laman nangko, aia taganang lah basauak, janjang
talangkai lah batingkek. Tabukak pintu badarun, tabantang lapiak nan Panjang,
lah lalu ka ruang tangah.
Basalam bajawek tangan katando baputiah
hati. Bandua tarantang lah batapiak, lapiak tabantang lah bakaduduak-i. kok
duduak alah sahamparan selo, kok tagak lah saedaran tapak. Dibilang maisok alah
sapadam baro, kok mangunyah alah sakariang sampah.
Dibilang
minum jo makan alah salamaik samparono, minum lah tibo di nan sajuak makan lah
tibo di nan sadang, ndak kaado upek nan katibo, antah kok sanjuang nan
kadatang.
Pun
baato anyo lai, pihak di kami nan datang, etan di ranah Jorong _________, guno
manamui Niniak Mamak kami nan di siko, nak manyampai-an niaik jo nazar. Kok ado
nan taragak takana, nan takilan-kilan di hati, alah ko patuiak kami katangahan,
aso alah kaduao balun, ikolah bana nan dianta, dianta sampai bakeh Sutan.
Iyo, maa
Sutan. Apolah bana nan takilan-kilan di hati, nan takana di kiro-kiro, pihak di
kami nan datang, iyo tasuruah tasarayo dek inyiak Dt.___________ nak manamui
Niniak Mamak kami di siko, nak manyampaian niaik jo nazar, iyo nak manjapuik
anak kamanakan dek inyiak ________ nan banamo ___________ nak manjadi anak
minantu kami.
Pintak
kami nak babari, kandak kami nak bapalakuan. Kok japuiknyo japuik tabao, tabao
lalu bairiangkan, sakian bana nan ambo anta, dianta sampai ka bakeh Sutan.
***
Diambil dari Catatan Yoserizal
No comments:
Post a Comment
SILAHKAN TINGGALkAN TANGGAPAN DI SINI